baat karni mujhe mushkil - kabhi aisi to na thi

Bahadur Shah Zafar ...


baat karni mujhe mushkil - kabhi aisi to na thi
jaisi ab hai teri mahfil - kabhi aisi to na thi

le gayaa chheen ke kaun aaj tera sabr-o-qarar
beqaraari tujhe ai dil - kabhi aisi to na thi

chashm-e-qaatil meri dushman thi hameshaa lekin
jaise ab ho gai qaatil - kabhi aisi to na thi

un ki aankhon ne khuda jaane kiya kya jaaduu
ke tabiyat meri maail - kabhi aisi to na thi

aks-e-rukh-e-yaar ne kis se hai tujhe chamkaayaa
taab tujh mein maah-e-kaamil kabhi aisi to na thi

kya sabab tu jo bigadtaa hai "zafar" se har baar
khuu teri huur-e-shamaail - kabhi aisi to na thi