tere qadamon pe sar hoga qazaa sar pe khadi hogi

Seemab Akbarabaadi ...

tere qadamon pe sar hoga qazaa sar pe khadi hogi
phir us sajde kaa kya kahna - anokhi bandagi hogi

nasim-e-subah gulshan mein gulon se khelti hogi
kisi ki aakhri hichki - kisi ki dillagi hogi

dikha duungaa sar-e-mahfil bataa duungaa sar-e-mahashar
vo mere dil mein honge aur duniya dekhti hogi

mazaa aa jaayegaa mahashar mein phir sunane-sunaane kaa
zubaan hogi vahaan meri kahaani aap ki hogi

tumhen daanistaa mahfil mein jo dekha ho to mujrim
nazar aakhir nazar hai be-iraadaa uth gai hogi