Kaam aa sakin na apni vafaayen to kya karen

Akhtar Shirani ...

Kaam aa sakin na apni vafaayen to kya karen
ik bevafaa ko bhuul na jaayen to kya karen

mujh ko ye etaraaf duaaon mein hai asar
jaaye na arsh par jo duaayen to kya karen

ik din ki baat ho to use bhuul jaayen hum
naazil hon roz dil pe balaayen to kya karen

shab bhar to un ki yaad mein taare ginaa kiye
taare-se din ko bhi nazar aayen to kya karen

ahad-e-tarab ki yaad mein roya kiye bahut
ab muskuraa ke bhuul na jaayen to kya karen

ab jee mein hai ki un ko bhulaa kar hi dekh len
vo baar baar yaad jo aayen to kya karen

tark-e-vafaa bhi jurm-e-muhabbat sahi "akhtar"
milne lagen vafaa ki sazaayen to kya karen