Umr jalvon mein basar ho ye zaruuri to nahin

Khamosh Dehlvi ...

umr jalvon mein basar ho ye zaruuri to nahin
har shab-e-gham ki sahar ho ye zaruuri to nahin

chashm-e-saaqi se piyo yaa lab-e-saagar se piyo
bekhudi aathon pahar ho ye zaruuri to nahin

nind to dard ke bistar pe bhi aa sakati hai
unki aagosh mein sar ho ye zaruuri to nahin

shiekh kartaa to hai masjid mein khudaa ko sajade
usske sajadon mein asar ho ye zaruuri to nahin

sab ki nazaron mein ho saaqi ye zaruuri hai magar
sab pe saaki ki nazar ho ye zaruuri to nahin