Kal Tak Mujhko Gaurav Tha

kal tak mujhko gaurav tha - main devtaaon ki hoon santaan 
aaj magar hoon aadha jaanwar - aaj hoon mein aadha insaan

kal tak meri dhadkan-dhadkan jeevan raag sunaati thi 
aaj hai mere ang ang mein jaise thanda ek shamshaan

kaun pukaara kaun pukaara - dekho sab kuch badal gaya 
koi peeche choot gaya hai - koi aage nikal gaya

aag ke hain ye naag jo hain lipte hue mere tan se 
pairon se aur baazoo se aur seene se aur gardan se 

dharti ki aankhen bheegi hain - ambar bhi rota hai 
duniya mein koi sab paata hai aur koi sab khota hai

jharne ho nadiyaan ya sagar - sab hain paani ke dhaare 
lekin in aankhon ke aasoon - jaise pighle angaare

cheekh rahi hai saari dishayen - koi disha khaamosh nahin 
dosh nahin hai tera lekin - phir bhi tu nirdosh nahin

doob na jaaye duniya teri - aason ki is baarish mein 
lagta hai tera dil aur aankhen - dono hain iss saazish mein