Uss Ki Hasrat Hai Jise Dil Se Mita Bhi Na Sakoon

Ameer Minai…

Uss ki hasrat hai jise dil se mita bhi na sakoon
Dhoondhane uss ko chalaa hoon jise paa bhi na sakoon

Daal kar khaak mere khoon pe qaatil ne kahaa
Kuchch ye mehandi nahin meri ke mita bhi na sakoon

Zabt kambakht ne aur aa ke galaa ghonta hai
Ke usse haal sunaaoon to sunaa bhi na sakoon

Uss ke pahlu mein jo leja ke sula doon dil ko
Neend aisi usse aaye ke jagaa bhi na sakoon

Naqsh-e-paa dekh to loon laakh karoonga sajde
Sar mera arsh nahin hai ki jhuka bhi na sakoon

Bevafaa likhte hain vo apni kalam se mujh ko
Ye vo qismat ka likha hai jo mita bhi na sakoon

Iss tarah soye hain sar rakh ke mere zaanon par
Apni soi hui qismat ko jagaa bhi na sakoon