Vo Har Maqaam Se Pahle Vo Har Maqaam Ke Baad

Qabil Ajmeri…

Vo har maqaam se pahle vo har maqaam ke baad
Sahar thi shaam se pahle sahar hai shaam ke baad

Har inqalaab-e-mubaarak har inqalaab-e-azaab
Shikast-e-jaam se pahle shikast-e-jaam ke baad

Mujh pe itni tavajjo mujh se itna gurez
Mere salaam se pahle mere salaam ke baad

Charaag-e-bazm-e-sitam hain humara haal na poochh
Jale the shaam se pahle bujhe hain shaam ke baad

Ye raat kuchh bhi nahin thi ye raat sab kuchh hai
Tuluu-e-jaam se pahle tuluu-e-jaam ke baad

Vahi zubaan vahi baaten magar hai kitna farq
Tumhaare naam se pahle tumhaare naam ke baad

Hayaat giriyaa-e-shabnam hayaat raqs-e-sharar
Tere payaam se pahle tere payaam ke baad

Ye tarz-e-fiqr ye rang-e-sukhan kahaan 'Qabil'
Tere kalaam se pahle tere kalaam ke baad