Ye Sheeshe, Ye Sapne, Ye Rishte, Ye Dhaage

Sudarshan Faakir…

Ye sheeshe, ye sapne, ye rishte, ye dhaage
Kise kya khabar hai kahaan tuut jaayen
Muhabbat ke dariya mein tinke vafaa ke
Na jaane ye kis mod par doob jaayen

Ajab dil ki basti, ajab dil ki vaadi
Har ek mod mausam nai khvaahishon ka
Lagaaye hain humne bhi sapnon ke paudhe
Magar kya bharosa yahaan baarishon ka

Muraadon ki manzil ke sapnon mein khoye
Muhabbat ki raahon pe hum chal pade the
Zaraa door chal ke jab aankhen khuli to
Kadi dhuup mein hum akele khade the

Jinhen dil se chaahaa, jinhen dil se pujaa
Nazar aa rahe hain vahi ajnabi se
Ravaayat hai shaayad ye sadiyon puraani
Shikaayat nahi hai koi zindagi se